Adiccion na Wega di placa!

Hopi biaha hende ta purba e “suerte” den diferente forma di wega di placa (gamble), sea ta den partido di deporte, careda, slotmashin of carta.

Awendia hende por participa den tur sorto di wega di placa, tambe via telecomunicacion (sin ta presente na e lugar di wega). Pero awor kico ta gamblemento y kico por ta e efectonan? Kico abo mes ta pensa tocante esaki?

Gamblemento den realidad ta un cuestion di perde of gana. Abo como hungador No tin ningun influencia riba e resultado di e wega. Ni tampoco dor di observa e mashin of e combinacionnan di e wega bo tin un influencia. Despues di e wega bo ta simplemente mas rico of pober financieramente. Ningun persona por bisa adelanta cuanto placa e lo obtene despues di e wega, locual bo por bisa ta e premionan cu ta wordo priminti na bo como hungador (e asina jama; jackpot).

Mayoria biaha e gamblemento ta basa ariba asunto di placa cu ta haci esaki uno excitante y atractivo.

Gamble cu un mashin.

Un gambledo di mashin hopi biaha tin “suerte” na cuminsamento di e wega.
Na inicio di e wega bo ta “gana”, pero mas bo hunga bo por ta sigur cu bo lo perde mas cu bo gana. Esaki ta asina for di e punto
di bista logico, e sorto di wega aki mester tin dos ganador, uno ta e propetario y despues ta abo!  

Tambe ta asina cu un mashin ta paga mas o menos 80% di locual wordo inverti bek na e hungador. Awor bo ta puntra bo mes ta dicon bo ta perde mas cu bo ta gana? E chens pa bo gana e jackpot (premio mayor) ta hopi biaha mas chikito cu e chens di haya 80% bek. Tambe ainda bo tin e chens di keda sin haya “algo” bek.

Adiccion na gamblemento?

Na momento cu bo “gana” algo, naturlamente cu esaki ta agradabel y ta duna e gana pa bolbe “purba” un biaha mas.
Mas bo “purba” mas bo lo sinti e “kick”(excitacion) pa sigui hunga. Bo ta haya e kick ora bo gana pero e sentimento di decepcion ora bo perde ta sigui crece! Hende no ta hunga pa e placa so, pero mas tanto pa haya e sentimento (kick) di gana. Tambe tin hende ta uza esaki como “escape” di nan bida diario, un rato alegre, abo cu e mashin. 

E kick ey ta ponebo mira solamente e ganashi (jackpot, premio) y no locual bo ta gasta/perde. E adicto na gamble su mente ta focus solamente na haya tur locual e la inverti bek y esaki hopi biaha no ta sosode. Tambe e adicto ta kere cu e por haya sa e secreto di e mashin (e momento di pago ect). Pesey tambe e por sinti e mesun “deseo” pa gamble cu un adicto na droga por ehempel ta sinti pa uza su droga. Adiccion na gamblemento ta wordo trata cu diferente forma di terapia pero tambe por bisa similar na otro adiccionnan. No ta necesario pa rehabilita fisicamente pero esey no kiermen cu e adicto no por haya simptomanan negativo fisicamente.
Ora hende ta gamble hopi nan curpa ta produci e asina jama “endorfina”y na momento cu abstene di gamblemento esaki por causa cu e curpa ta haya falta di e substancia aki y por duna e adicto complicacionnan.

Mayoria adicto na gamblemento ta haya problemanan financiero y despues di esaki tambe den problemanan mas grave socialmente manera; problema familiar, cu justicia, debe etc.

Pa mas informacion: Fundacion Anti Droga Aruba, 5832999 of bishita nos oficina situa na Campanastraat 5 den Tarabana.

 Bishita nos riba facebook.