Informacion pa Mayornan

Ki ora por cuminsa cu prevencion di droga serca nos jiunan?

Mayornan mester cuminsa cu prevencion di droga ora e mucha ta hoben, como cu e ora e mucha por absorbe hopi mas informacion y influencia positivo. Mas chikito un mucha ta, mas nos por logra serca dje. Muchanan mester wordo prepara cu norma y balornan basico di bida, respet, cuido personal, higiena, responsabilidad etc.

Nos muchanan hopi biaha no ta capacita ainda pa enfrenta y bringa e peligernan di e tentacion di droga.
Ta nos mester judanan y guianan cu e hermentnan necesario pa enfrenta y bringa e peligernan aki. Ta deber
di cada un di nos pa haci esaki y ta hopi necesario pa cuminsa awor y no mañan.

Pa por juda nos jiunan, ta importante pa nos como mayornan evalua nos mes y analisa nos mes como Mayor,
pa wak si nos ta cumpliendo cu e exigencianan basico pa ser un bon Mayor cu ta e.o; duna cuido/amor, duna respet y ta responsabel.

Na prome lugar nos mester ta "E ehempel" pa nos jiunan. Esaki ta encera tambe haci locual nos ta bisa.
Hopi biaha ta asina cu nos ta bisa nos jiunan kiko nan mester haci y nos mes ta haci tur lo contrario.
Corda cu muchanan ta imita hopi e comportacion di nan mayornan!

Tips pa Mayornan por lanta jiunan sano :

Busca y aplica conocimento di accionnan pa ser un bon mayor. Aplica locual ta bon/sano pa e mucha.

Recompensa bon conducta, exito y desaroyo di e mucha

Actua semper den bienestar di e mucha, si e kier of no. No kere cu complaciendo nos jiunan, nos ta evita di haci nan sinti tristo. Si abo sa cu locual e kier no ta na su bienestar NO HACIE.

Actua apropiadamente y sin miedo cu bo lo afecta e mucha.
Papia cu bo jiunan na un manera respetuoso tocante cosnan di bida manera sexualidad, embaraso, sex, aids, droga, depresion, suicidio etc…

AUMENTA BOSO CONTACTO CU OTRO DIARIAMENTE. ESAKI TA SANO.

UN BON CONTACTO CU BO JIU TA EVITA MAL INFLUENCIA EXTERNO.

Con nos ta compronde nos jiunan mas mihor?

Un di e problemanan grandi awendia, ta cu nos como Mayor NO ta pone nos mes den sapato di nos jiunan.
Nos no ta envolucrando nos mes den nan mundo. Nos ta spera mucho hopi cu nan ta sigui biba den nos mundo.

Pa nos sa ken realmente nos jiunan ta, sa y reconoce nan inquietud- y inseguridadnan, nos mester COMPARTI mucho mas cu nan. No laga pa mañan locual bo por haci awe. Tene un bon combersacion diario cu nos jiunan por juda nos compronde nan mihor y consecuentemente juda nan mihor tambe.

Awendia nos jiunan ta wordo azota via tur medionan pa influencianan di alcohol, droga, embaraso hubenil, peer-pressure etc…nos mester inverti mucho mas tempo y atencion pa combati influencianan di e problematicanan aki.

Percura pa bo jiu sa dicon e mester bisa No ora e wordo ofreci su prome droga.

Siña muchanan tuma decisionnan corecto

Pa muchanan por siña tuma decisionnan corecto den futuro, ta importante pa nos prepara nan debidamente cu informacion y experencia.

Nos tur kier pa nos jiunan tuma decisionnan corecto ora nan bira grandi. Tumamento di decisionnan corecto ta algo cu nos por siña nos jiunan. Ta importante pa tuma tempo, sinta cu nos jiunan un rato y analisa con ta tuma decisionnan y con ta haci escogencianan corecto cu ta na nan bienestar.
Nan mester sa cu tur decision tin consecuencianan cu por ta positivo of negativo!

Awendia nos jiunan ta wordo bombardea cu tur sorto di influencianan, p.e. por medio di propaganda.
E mensahenan aki tin un solo meta : cumpra, cumpra y cumpra. Hopi di e mensahenan aki no ta berdad.
Nan ta mas bien mensahenan cu ta bruha e mente di e mucha. Tambe tin avalancha di propagandanan cu
ta promociona uso di alcohol y sigaria abiertamente, asociando e cosnan aki cu sexualidad, exito y beyesa.
Tur e mensahenan aki tin influencia riba e mucha.

Pa combati e tentacionnan aki, nos como Mayor mester saca tempo, splicanan cu e cosnan aki ta maniobranan 
di comerciantenan pa asina bende nan producto. Ta haci tur lo posibel pa influencia e mente di e hoben
pasobra nan sa cu ta aki ta caminda nan por logra influencia hopi mas liher y bende productonan facilmente.

Ta importante tambe pa puntra e mucha kiko ta su opinion tocante tur e cosnan aki. Asina nos por habri un discusion abierto riba e mucha su pensamentonan. E ora bo por haya sa tambe si e mucha por wordo influencia facilmente of no.

Si un mucha ta influenciabel na chikito, esaki ta sosode ora e ta grandi tambe. E peliger ta ora cu constantemente e ta laga otronan tuma decision pe y influencia su mente.

Ora un mucha tuma un decision cu no ta corecto, no paga mucho atencion riba e fout cu ela comete sino analysa conhuntamente cu e mucha ta « DI CON » ela tuma tal decision. Asina nos por siña e mucha pa tuma decisionnan corecto den futuro y siña di su foutnan. Discuti su erornan cu ne y splica e mucha e « pakiko » di tur cos.