Adiccion
FADA - Adiccion

Abo sa kico ta adiccion?

Riba nivel mundial adiccion ta wordo considera como un "malesa" cu ta consisti di diferente factornan externo
y interno di cada persona, tambe e tin un poder progresivo, esey kiermen cu e ta progresa continuo (bira peor), esey no ta kita afo cu e ta cuminsa cu un escohencia personal.
E malesa di adiccion ta funciona riba nivel fisico
y mental di e persona, esey kiermen cu e curpa ta bira adicto fisico y mental, cu ta pone cu e stopmento (rehabilitacion) ta bira mas dificil.
Factornan externo ta encera, presion di grupo, problemanan social y media (tur locual nos ta wordo confronta cu ne).

Cu interno ta referi na nos amor propio, traumanan, emocionan y nos identidad personal (estilo di bida).
Hende por bira adicto na un substancia, pero tambe na un actividad por ehempel, gamblemento (wega di placa).

Adiccion no ta discrimina, e ta existi den tur pais, rasa, religion y status social den tur comunidad.
E ta cuminsa a base di un escohencia robes, cu por ehempel ta e uzo di substancianan o actividadnan adictivo.
Na momento cu e persona kier stop, su curpa ta reacciona na un manera di mal- estar; diarrea, sacamento, dolor di cabes, beis , irritacion ect. Tambe e persona ta experencia problemanan mental manera; confusion, perdida di memoria, insomnio, y e chens pa haya malesanan mental ta engrandece.

Na momento cu adiccion domina e aspectonan fisico y mental, e otro aspectonan tambe ta wordo afecta,
manera e parti spiritual y social di e persona. Ora un persona ta sufri di e malesa adiccion e no tin dominio
riba niun di e aspectonan principal di su bida.
Un adicto ta gasta tur su placa, energia y tempo pa por complace su adiccion. Tambe nan ta desaroya un comportacion adictivo pa por mantene nan adiccion, esaki ta encera diferente actitudnan cu no ta acceptabel socialmente, por ehempel; gañamento, manipulacion, sconde informacion, culpa otro, instiga etc.

Na Aruba nos tin diferente instancianan cu ta ofrece ayudo y nos di FADA cu ta ofrece servicionan di prevencion!

Con pa determina si bo ta adicto na un droga

Un di e preguntanan cu un persona cu ta den e problema aki ta haci cu mas frecuencia ta : Ami ta un adicto?

Pa por facilita e personanan aki, un ekipo di expertonan a formula diferente preguntanan cu por determina si
e persona cu kier haya sa si e ta adicto, mester di ayudo.

Siguientemente nos ta presenta algun di e preguntanan cu ta duna un "indicacion" di presencia di adiccion.
E preguntanan aki por wordo haci na e persona pa asina por determina si e ta adicto of no. Si bo contesta "SI" na mayoria di e preguntanan bo por considera cu e persona tin mester di ayudo profesional.

  1. Mester cada biaha di dosisnan mas halto di e droga pa asina experimenta e efectonan cu antes bo tabata experimenta cu cantidadnan mas chikito?
  2. Bo ta use continuamente te ora cu e caba?
  3. E costo di e droga ta e factor principal cu bo ta limita su uso?
  4. Bo ta desea di cumpra mas?
  5. Bo ta usa droga dos of mas biaha pa siman?
  6. Bo mester usa otro droga of ingeri alcohol pa calma despues di usa cocaina?
  7. Bo tin miedo cu si bo stop di use lo bo bai sufri?
  8. Bo no por rechaza e droga ora cu un hende ofrecebo esaki?
  9. Bo ta soña cu e droga?
  10. Bo no por stop di use durante un luna?
  11. Bo ta prefera e droga envez di actividadnan familiar, cuminda of relacionan sexual?
  12. Bo ta bende e droga of bo ta distribui esaki na otro persona?
  13. Bo ta falta bo trabou, cambia bo citanan of bo no ta cumpli cu bo obligacionnan importante debi na e uso di e droga?
  14. Bo ta wordo bisa dor di otro hende cu bo apariencia a cambia?
  15. Bo ta sufri di e sindroma di abstinencia (malestar) ora cu bo ta stop di usa e droga?
  16. Bo ta desea de vez en cuando pa un hende descubribo y stimulabo pa haya e tratamento necesario pa asina bo por
    recupera bo mes?

 

 

13:30 to 16:30

F.A.D.A (Fundacion Anti Droga Aruba). Tel. (+297) 583-2999 / 583-9610