Gamblemento
FADA - Droga

Gamblemento (adiccion na weganan di plaka)

Hopi biaha hende ta purba  “suerte” den diferente forma di wega di placa (gamble), sea ta den partido di deporte, careda, slotmashin of carta.

Awendia hende por participa den tur sorto di wega di placa, tambe via telecomunicacion (sin ta presente na e lugar di wega). Pero awor kico ta gamblemento y kico por ta e efectonan?

Gamblemento den realidad ta un cuestion di perde of gana. Abo como hungado no tin ningun influencia riba e resultado di e wega, ni tampoco dor di observa . Despues di  wega bo ta simplemente mas rico of pober financieramente. Ningun persona por bisa adelanta cuanto placa e lo obtene despues di e wega, locual bo por bisa ta e premionan cu ta wordo priminti na bo como hungador (e asina yama; jackpot).

Mayoria biaha e gamblemento ta basa riba asunto di placa cu ta haci esaki uno exitante y atractivo.

Gamble cu un mashin.

Un gambledo di mashin hopi biaha tin “suerte” na cuminsamento di  wega.

Na inicio di  wega bo ta “gana”, pero mas bo hunga den mayoria caso e chens ta grandi cu bo lo perde mas cu bo  a gana. Esaki ta asina for di e punto di bista logico, e sorto di wega aki mester tin dos ganado, uno ta e propietario y despues ta abo!

Tambe ta asina cu un mashin ta paga mas o menos 80% di locual wordo inverti bek na e hungado. Awor bo ta puntra bo mes ta dicon bo ta perde mas cu bo ta gana? E chens pa bo gana e jackpot (premio mayor) ta hopi biaha mas chikito cu e chens di haya 80% bek. Tambe ainda bo tin e chens di keda sin haya “algo” bek.

 

Adiccion na gamblemento?

Na momento cu bo “gana” algo, naturlamente cu esaki ta agradabel y ta duna  gana pa bolbe “purba” un biaha mas. Mas bo “purba” mas bo lo sinti  “kick”(excitacion) pa sigui hunga. Bo ta haya kick ora bo gana pero e sentimento di decepcion ora bo perde ta sigui crece! Hende no ta hunga pa e placa so, pero mas tanto pa haya e sentimento (kick) di gana. Tambe tin hende ta uza esaki como “escape” di nan bida diario, un rato alegre, abo cu e mashin.

E kick ey ta ponebo mira solamente e ganashi (jackpot, premio) y no locual bo ta gasta/perde. E adicto na gamble su mente ta fiha solamente na haya tur locual e la inverti bek y esaki hopi biaha no ta sosode. Tambe e adicto ta kere cu e por haya sa e secreto di e mashin (e momento di pago ect). Pesey tambe e por sinti  mesun “deseo” pa gamble cu un adicto na droga por ehempel ta sinti pa uza su droga. Adiccion na gamblemento ta wordo trata cu diferente forma di terapia pero tambe por bisa similar na otro adiccionnan. No ta necesario pa rehabilita fisicamente pero esey no kiermen cu e adicto no por haya simptomanan negativo fisicamente. Ora hende ta gamble hopi nan curpa ta produci e asina yama “endorfina”y na momento cu abstene di gamblemento esaki por causa cu e curpa ta haya falta di e substancia aki y por duna e adicto complicacionnan.

Mayoria adicto na gamblemento ta haya problemanan financiero y despues di esaki problemanan mas grave socialmente manera; problema familiar, cu husticia, debenan cu por hiba  te hasta na suicidio.

Pa mas informacion por tuma contacto cu FADA na telefon: 5832999 of 5839610.

Tambe por comunica via fax nr: 5834501, via fundacionantdroga.org  of via Facebook.

FADA ta situa na Campanastraat 5, Dakota (Tarabana).

 PREVENI  MIHO CU LAMENTA

 

13:30 to 16:30

F.A.D.A (Fundacion Anti Droga Aruba). Tel. (+297) 583-2999 / 583-9610