Bo yiu y su amigonan “Alcohol y Cocaina”.

F.A.D.A . ta presenta un poema pa conscientisa y alerta mayornan

Pa añanan caba tin dos amigo den bo yiu su bida.

Bo mes como mayor, sa historia completo di e amigonan aki y nan famia.

Nan historia no ta nada di gaba, pero abo como un bon mayor a duna bo yiu keri e beneficio di duda. Su 2 amigonan cu ta compañe diariamente ta preshone constantemente pa nan drenta cas. Pero bo yiu sa mucho bon cu abo como mayor no ta niun tiki felis cu nan amistad. E problema di mas grandi ta cu nan ta bai e mesun scol, den e mesun klas y nan ta practica e mesun deporte.

Dus den un palabra bisa; bo no por separanan for di otro.

Poco poco bo ta wak bo yiu ta tuma e caracteristica di su amigonan y a jega na e punto cu segun e, esey te style!

Ora bo tende ta combersa cu nan na telefoon bo ta tende e palabra “pakket” y e palabra “blanco” ta sobresali mas cu tur cos. Tambe enfasis ta wordo poni masha tanto mes riba e “botter”.

Abo como mayor responsabel, trahado y cu no por inverti mucho tempo den bo yiu, no sa y no por compronde kico e “codes” ney ta significa.

Segun bo tur cos ta basa riba e lesnan di scol y nan famoso deporte cu nan ta practica.

E dieet cu bo yiu ta tumando ta uno incomprendibel, e no ta come masha, pero si e ta huma hopi sigaria y bo cerbesnan den frishider cu ta destina pa bishita,

ta caba pa minuut. E cas completo ta airco pero bo yiu ta soda masha hopi mes, semper e tin calor. E tin un nervio diario, cu cada bes su cachete ta di links pa rechts. Tambe semper e ta loer na bentana di cushina paso segun e,

tin enemigonan ta busce. Scol den dia e no kier bai mas, paso durante dia e yiu stima mester sosega. Anochi ta di dia pe y di dia ta manera un fierno.

Di dia e ta hopi agresivo y e no tin pasenshi. E palabra respet no ta den su vocabulario mas. Ela perde nocion di hende, di dia y  automaticamente su mes.

Norma y balor a tuma su rumbo y su spiritualidad a desolve.

Wak con e mayor ta mira su yiu ta caba na nada y pa motibo di berguensa no ta busca ayudo pe.

E yiu mes kier pero e mayor no ta compronde cu e malesa mester trate!

Awor cu e yiu ta perdi den scuridad, e 2 amigonan a laga su man bai y no kier tin su amistad mas. Pero segun e yiu, e mes no falta nada, den su pensamento su 2 amigonan “Cocaina y Alcohol” por wel di muri numa, paso awor e tin un mihor

Amigo cu ta compronde su pena y ta biba cu su dolor.

Esaki te humilde amigo di cas, señor “Piedra”.

Si abo como mayor ta duda den cualkier actividad di bo yiu, no perde tempo, busca informacion mas liher cu ta posibel na e instancia concerni pabo sali di tur duda.